Bideojokoen azelerazio-campusak, GAME.EUS izenekoa, joan den asteazkenean itxi zuen bere seigarren edizioa, sei astetako lan intentsiboaren ostean. Itxiera-ekitaldia Demo Day izan zen, eta bertan bost talde parte-hartzaileek beren bideojoko-proiektuak aurkeztu zizkieten sektoreko adituei, datozen hilabeteetan proiektu horiek izango duten nazioarteko proiekzioa aurreratuz. Programa hau Eusko Jaurlaritzak, Arabako Foru Aldundiak sustatu dute, EUNEIZ Fundazioak gidatu du ekainaren 10etik uztailaren 23ra bitartean, eta hamar hitzaldi publiko jaso ditu, bideojoko-industriako profesional ospetsuek emandakoak.

Demo Day uztailaren 23an ospatu zen Villa Suso Jauregian, eta bertan izan zen “Bideojokoen ekosistema garatuz Euskadin” mahai-ingurua –Isabel Liébana, Puzztime! enpresako zuzendari nagusia eta sortzailea, eta Arturo Monedero, bideojokoen diseinatzailea, AEVIko Garapenaren presidenteordea eta EUNEIZeko irakaslea partaide zirela–, baita bost taldeen bideojoko azeleratuen aurkezpen publikoa ere. Ondoren, networking-gune bat ireki zen sortzaile eta garatzaileek sektoreko argitaratzaile eta inbertitzaileekin harremanetan jartzeko helburuarekin.

Ekitaldian parte hartu zuten Arabako Garapen Ekonomikoaren eta Iraunkortasunaren Foru Diputatua, Saray Zárate; EUNEIZ Unibertsitateko errektorea, Eva Eguiguren; eta GAME.EUS-eko zuzendari exekutiboa, David Darnés. Bertan izan zen baita ere Eusko Jaurlaritzako Kultura Plangintzako Zerbitzuburua, Itziar Redondo. Programa BIC Arabak koordinatzen du eta EUNEIZ Unibertsitateak babesten du, zeinek laugarren urtez jarraian hartu baitu campusa bere egoitzan.

Diputatuaren hitzetan, “ohore bat da Araban talentu eta kalitate handiko taldeak hartu eta laguntzea. Arabako Foru Aldunditik ziur gaude GAME.EUS bezalako ekimenek aukera bikaina eskaintzen dutela bideojoko berriak abiarazteko, eta gure lurraldearen berrikuntza eta dinamismoa erakusteko”.

Bestalde, EUNEIZeko errektore Eva Eguigurenek zoriondu zituen bost taldeak egindako lanagatik, “parte-hartzaileen ibilbide profesionala eta, ondorioz, bideojokoen sektorea Euskadin sendotzen lagunduko duelako zalantzarik gabe”. Eguigurenek azpimarratu zuen EUNEIZ Fundazioak, aurreko ediziotik campusaren gidaritzapean dagoela, eta unibertsitateak ere sektore honen inguruan ezagutza sortu eta talentua bultzatzeko egiten duen lana. EUNEIZ Unibertsitateak, Bideojokoen Arterako Gradua eta Bideojokoen Diseinu eta Garapenerako Gradua eskaintzen dituenez, campus hau aukera bikaina da bi ardatz nagusitan: akademikoki, prestakuntza osatzeko, eta profesionalki, ekintzailetza aukerak eta sektoreko adituekin harremanak sendotzeko.

Hiru euskal talde, kataluniar bat eta galiziar bat aritu dira sei asteko azelerazio-campusean, formakuntza eta mentorien bidez negozio-mentalitatea landuz, beren jolasak merkatura arrakastaz eramateko. Helburua izan da taldeei funtsezko arloetan —diseinua, produkzioa, marketina eta negozioa— tresnak eta gaitasunak eskaintzea.

EUNEIZ Fundazioko David Darnések nabarmendu duenez, “GAME.EUSek behin betiko kokatu du Euskadi bideojokoen industriaren mapa globalean. Edizio honek mugarri izan da: sormenaren bikaintasuna eta enpresa-zorroztasuna bateratzea lortu dugu. Gure lan-eredua hiru ardatzetan oinarritu da: talentuaren garapena, iraunkortasuna eta nazioarteko proiekzioa”. Darnések gogoratu duenez, abuztuan garatzaileek GAMESCOM azokan parte hartuko dute, Espainiako pabiloiaren baitan stand instituzionala izango dute, argitaratzaile eta inbertitzaileekin bilduko dira, eta beren jolasen bertsio profesionalak aurkeztuko dituzte. Urrian ere egongo dira BCN GAME FESTen, Bartzelonan, espazio bereizi batean. “Estudioen belaunaldi berri baten sorrera ikusten ari gara, eta Euskadik sektore honetan berrikuntzaren lidergoa hartzeko duen gaitasuna erakusten ari da”, adierazi du.

Programan, gainera, industria-ko profesionalen mentoring indibiduala jaso dute taldeek. Parte hartu dutenen artean daude: Oscar Sahun (ekintzaile eta bideojokoen diseinatzaile eta ekoizlea), Alexander Camarero (Keplerians enpresako sortzaile eta zuzendari sortzailea), Lucía Quijano (publishing eta komunikazio aditua, Impulse Lean Publishing-eko sortzailea), Arturo Monedero (AEVIko presidenteordea eta EUNEIZeko irakaslea), Sandra Samper (EUNEIZeko Fakultate Teknologiko Interaktiboen dekanoa), Ferrán Puntí (The Breach Studios-eko sortzaile eta CEOa), Virginia Martín Pérez (16 urteko esperientziarekin bideojokoen diseinatzailea), Xènia Castelltort (coach eta antzerki-metodologian oinarritutako hitzartze aditua), Aitor Jiménez (Baskonia-Alaves taldearen berrikuntza estrategiaren arduraduna), eta David Darnés bera (campusaren zuzendaria eta bideojokoen aholkulari eta mentorea). Mentoretzez gain, “mixer” irekiak eskaini zituzten herritarrentzat sektorea gizarteratzeko.

“GAME.EUSeko mentore eta hizlariek aldea markatu dute edizio honetan. Finantzaketa, negozio eta marketin arloetan adituak izanik, tresna errealak eskaini dizkiete taldeei merkatu globalean lehiatzeko. Ezagutza teknikoa eta ikuspegi estrategikoa uztartuta, proiektuen kalitatea nabarmen hobetu dute, Euskadik bideojokoen industrian lortzen ari den bikaintasun-maila islatuz”, azpimarratu du Darnések.

Villa Suson aurkeztutako bost taldeen proiektuak eta genero nagusiak hauek dira:

• Box Collider Game Studio (Vitoria-Gasteiz): Gasteizko taldeak “The Heart of Anatema” aurkeztu du, estrategia denbora errealean oinarritutako jokoa, non erresumako mugetatik haratago dagoen baso urrun batean altxorrak bilatu beharko ditugun lurralde madarikatuan.

• Zomorro Studio (Gipuzkoa): Ibai Aizpurua garatzaile independentea da, Irungo egoitzarekin. Proiektu bakoitzean mekanika eta estilo grafiko ezberdinak esploratzen ditu (plastilina, tinta, pixel art…). “Guillotine” izeneko jokoan, bururik gabeko borrero baten abentura sadikoetan murgiltzen gara Euskal Herri tradizionalaren barrena.

• DEP Games (A Coruña): Galiziako estudio independente honek “Unicorn Wars” aurkeztu du, ekintza eta plataformen jokoa. Bertan, hartz txiki eta unikornioko arteko gerra sakratua bizi dugu. Zatitzea, tiro egitea eta hilketak dira zure misio sakratuaren parte. Hil egin unikorniari!

• Auxilio Games (Bilbo): 2023an sortua, Málaga Jam batean parte hartu ondoren. Ikuspegi queer eta LGBTQ+ batetik gizartea interpelatzen duten istorioak kontatzeko helburua dute. Lehen proiektu profesionala: “The Great Farce”, Espainiako Trantsizioan girotutako misterio-joko ez-lineala, Point and Click mekanikekin.

• Flatline Studio (Bartzelona): Argentina jatorriko familia eta lagunek osatua, Bartzelonan finkatua. “Into The Grid” garatzen ari dira: etorkizun distopiko batean girotutako jokoa, hacker eta korporazio gaiztoen arteko borrokan oinarritua.