– Datorren ekainaren 10ean hasiko den azelerazio publikoko programak 6 asteko  iraupena izango du, eta parte hartuko duten bost taldeen artean tokiko sortzaileen  hiru proposamen izango ditu. 

– Arabako Foru Aldundiak eta Eusko Jaurlaritzak bultzatutako seigarren edizio hau  Vitoria-Gasteizko Unibertsitateak (EUNEIZ) hartuko du, eta uztailaren 23an amaituko  da Demo Day egunarekin. 

Vitoria-Gasteiz, 2025eko maiatzaren 27a.- Datorren ekainaren 10ean hasiko da  GAME.EUS bideojokoen campus azeleragailuaren VI. edizioa. Aurten, tokiko talentua  sortzeko eta atxikitzeko apustuan aurrera egingo du, bost parte-hartzaileen artean  euskal jatorriko hiru talderekin. Beste behin ere, EUNEIZ Vitoria-Gasteizko  Unibertsitateak hartuko du programa trinko hau, Arabako Foru Aldundiak eta Eusko  Jaurlaritzak sustatua. Sei aste iraungo du, eta uztailaren 23an amaituko da, Demo Day  egunarekin. 

“Iaz campusari eman genion ikuspegi berria indartu egin da deialdi honetan, euskal  zigilua duten hiru proiekturen parte-hartzearekin. Asmoa indie garatzaileen talde  txikien profesionalizazioa sustatzea da, Euskadin bideojokoaren sektorea indartzeko  eta sendotzeko “, azaldu du David Darnés-ek GAME.EUS Campuseko zuzendariak. Gasteizko talde batek, Irungo batek, Bilboko batek, A Coruñako batek eta Bartzelonako  beste batek osatuko dute aurtengo edizioa. Guztira 20 hautagaitza jaso zituen,  horietatik zortzi Euskadiko taldeenak. “Interes handia egon da campusean, estatu  osoko talde hautagaiekin eta kalitate maila altuarekin aurkeztutako jokoetan.  Baheketa zaila izan den arren, oso pozik gaude proiektu parte-hartzaileetan ikusten  dugun etorkizuneko proiekzioagatik “, azaldu du Darnések, Arabako Foru Aldundiak eta  Eusko Jaurlaritzako Kultura Sailak finantzatutako programa horren arduradunak, BIC  Arabak koordinatuta, EUNEIZ Unibertsitateak babestuta eta EUNEIZ Fundazioak  zuzenduta. 

Ekainaren 10etik aurrera, bost taldeak programa trinko honetan murgilduko dira,  Gamescom-en parte hartzeko behar bezain aurreratua den bideojoko bat duten Euskadiko garatzaileen taldeak prestatzeko helburuarekin. Gamescom Europako  sektoreko azokarik handiena eta garrantzitsuena da. 

Arabako Foru Aldundiak azpimarratu duenez, “urtetik urtera gero eta proposamen eta  proiektu gehiago jasotzen ditugu heldutasun- eta garapen-maila handiagoarekin,  bereziki hemen, Araban eta Euskadin garatutakoak. Bideojokoen sektoreak aukera  ematen digu gure jarduera ekonomikoa dibertsifikatzeko eta esparru berritzaile,  sortzaile eta dinamiko honetan erreferente gisa kokatzeko, eta campus hau sendotzea  horren froga da “, adierazi du Saray Zaratek Ekonomiaren Garapen eta  Iraunkortasunerako foru diputatuak. 

Azelerazio-campusak beharrezko tresnak eman nahi dizkie ekipoei, joko bat  merkaturatzeko prozesu osoan jauzi kualitatiboa ematen laguntzeko. Proiektu  bakoitzaren hasierako auditoria egin ondoren, taldeek diseinuari, produkzioari,  marketinari edo negozioari buruzko prestakuntza-saioak jasoko dituzte, eta, gainera,  mentoria indibidualak izango dituzte industriako profesionalen kontura, beren  proiektuak hobetzen laguntzeko. Nabarmentzekoa da prestakuntza gehienak publiko  orokorrari irekita daudela eta Campuseko web orrian kontsulta daitezkeela. “Asmoa da  ulertzea joko batean alderdi teknikoa eta sortzailea bezain garrantzitsua dela proiektu  bat kudeatzeko eta sustatzeko prozesua. Horregatik, negozio-mentalitate hori irakatsi  behar zaie, merkatu horren dinamikak ezagut ditzaten, finantzaketa eta/edo  publishing-a nola lortu edo Euskadin bideojokoen estudio bat nola eratu “, azpimarratu  du GAME.EUS-eko zuzendariak. 

Campusa Demo Day batekin amaituko da uztailaren 23an, bere lanak Gamescom-en  erakusteko aukera baino lehen egingo den aurkezpen batekin.